کراچی، سبزی منڈی میں خوفناک آتشزدگی 400 دکانیں خاکستر، 20 کروڑ کا نقصان
کراچی (ثناءنیوز) سبزی منڈی میں گزشتہ روز لگنے والی آگ سے سبزی اور فروٹ منڈی کے درجنوں تاجروں کو کروڑوں روپے کا نقصان ہو گیا۔ لگ لگنے سے 400 دکانیں اور 600 سے زائد پتھارے خاکستر ہو گئے۔ تاجروں کے مطابق منڈی میں آتشزدگی سے تاجروں کو تقریباً 20 کروڑ روپے کا نقصان پہنچا۔ تاجروں کا کہنا ہے کہ آگ لگنے کے فوری بعد منڈی کے ایڈمنسٹریٹر مرتضیٰ بلوچ سے رابطہ کرکے فائر بریگیڈ طلب کرنے کہا تو انہوں نے معاملے کو کوئی اہمیت نہ دی جس پر تاجروں میں شدید اشتعال پایا جاتا ہے۔ آگ سے تاجروں کے دفاتر، کاروباری ریکارڈ اور شیڈز کے قریب کھڑی گاڑیوں سائیکل رکشہ اور لکڑی کی ٹرالیاں بھی جل کر راکھ ہو گئیں۔ تاہم کسی جانی نقصان کی اطلاع نہیں ملی۔
