کیلیفورنیا (اے پی پی) ہسپانوی ٹینس سٹار اور سابق اولمپک چیمپئن رافیل نڈال نے 17 مرتبہ گرینڈ سلیم چیمپئن راجر فیڈرر کو شکست دے کر پری بی این پی باس اوپن ٹینس ٹورنامنٹ کے مینز سنگلز کے سیمی فائنل کےلئے کوالیفائی کر لیا۔ کیلیفورنیا میں جاری مینز سنگلز کے کوارٹر فائنل میچ میں رافیل نڈال نے سوئٹزرلینڈ کے راجر فیڈرر کو 6-4 اور 6-2 سے شکست دے کر سیمی فائنل میں جگہ بنائی۔ سیمی فائنل میں رافیل نڈال تھامس برڈچ کے مدمقابل ہوں گے، برڈچ نے کوارٹر فائنل میں کیون اینڈرسن کو زیر کیا تھا۔ دفاعی چیمپئن وکٹوریہ آزاررینکا اور سمانتھا سٹوسر فٹنس مسائل کے باعث کوارٹر فائنل میچوں سے دستبردار ہو گئیں۔ کیرولین وزنائیکی اور اینجلیق کربر کو حریف کھلاڑیوں کے خلاف واک اوور مل گیا اور دونوں سیمی فائنل میں داخل ہو گئیں۔ وکٹوریہ آزارینکا کا مقابلہ ڈنمارک کی کیرولین وزنائیکی سے ہونا تھا لیکن آزارینکا ٹخنے کی انجری میں مبتلا ہو گئیں۔ آسٹریلیا کی سمانتھا سٹوسر کا مقابلہ جرمنی کی انجلیق کربر سے شیڈول تھا لیکن وہ بھی انجری کا شکار ہو گئیں جس کی وجہ سے کربر کو واک اوور ملا گیا۔