لاہور (کامرس رپورٹر ) پاکستان رگبی ٹیم نے دبئی انٹرنیشنل سیونز ٹورنامنٹ کا پلیٹ فائنل جیت لیا جبکہ لبنان نے مین فائنل میں مصر کو شکست دے کر ٹائٹل اپنے نام کرلیا۔ انٹرنیشنل سیونز ٹورنامنٹ میں دوسرے روز پاکستان گروپ میچ میں یو اے ای کی ٹیم سے 21-12 سے ہارا اور پھر سعودی عرب کو 47-0 سے شکست دی۔ پاکستان کا آخری لیگ میچ لبنان کی مضبوط ٹیم سے تھا جس میں اسے 26-14 سے ہار کا منہ دیکھنا پڑا۔ دوسری جانب مصر نے یو اے ای کو ہرا کو لبنان کے خلاف فائنل کیلئے کوالیفائی کرلیا۔ پاکستان اور یو اے ای نے پلیٹ فائنل کیلئے کوالیفائی کیا۔ لبنان نے مصر کومین فائنل میں 12-7 سے ہرایا۔ پاکستانی ٹیم نے یو ای اے کو شکست دے کر لیگ میچ کا بدلہ لیا۔پاکستانی ٹیم نے میزبان ٹیم کو 36-14 سے ہرایا۔ اس طرح چھ ملکی انٹرنیشنل سیونز ٹورنامنٹ میں لبنان نے پہلی، مصر نے دوسری، پاکستان نے تیسری اور یو اے ای نے چوتھی پوزیشن حاصل کی۔