لاہور (سپورٹس رپورٹر) زونگ نیشنل پولو چیمپئن شپ فار قائد اعظم گولڈ کپ 2013ءکا ٹائٹل کالونی شوگر کی ٹیم نے ڈائمنڈ پینٹس کی ٹیم کو شکست دیکر جیت لیا ہے۔ ٹورنامنٹ میں تیسری پوزیشن آرمی/ کوکا کولا کے نام رہی۔ تفصیلات کے مطابق لاہور پولو کلب لاہور میں منعقد ہونے والے ٹورنامنٹ کا فائنل کالونی شوگر اور ڈائمنڈ پینٹس کی ٹیموں کے درمیان کھیلا گیا جس میں کالونی شوگر کی ٹیم نے 7 کے مقابلے میں 11 گول سے کامیابی حاصل کی۔ اس سے قبل تیسری پوزیشن کے کھیلے جانے والے میچ میں آرمی/ کوکا کولا کی ٹیم نے سنسنی خیز مقابلے کے بعد گارڈ گروپ کو 7-6 سے شکست دی۔ ٹورنامنٹ کی اختتامی تقریب کے مہمان خصوصی چیف ایگزیکٹو آفیسر زونگ فینگ ٹوکسین تھے جنہوں نے کامیاب ٹیموں میں انعامات تقسیم کیے۔