لاہور (سپورٹس رپورٹر) پاکستان ویمن کرکٹ ٹیم کی کپتان ثناءمیر نے کہا کہ نیشنل چیمپئن شپ ہی ملک میں نئے ٹیلنٹ کو فروغ دینے کے لئے مدد گار ثابت ہوتی ہے۔ لاہور میں جاری نیشنل چیمپئن شپ میں نوجوان نئے کھلاڑیوں کے لئے بہترین موقع ہے کہ وہ اپنی صلاحیتوں کا مظاہرہ کریں تاکہ مستقبل میں انہیں قومی ٹیم کے لئے زیرغور لایا جا سکے۔ باغ جناح لاہور میں میڈیا سے گفتگو کرتے ہوئے ثناءمیر کا کہنا تھا کہ قومی ویمن ٹیم نے انگلینڈ کا دورہ کرنا ہے جس میں ون ڈے اور ٹی ٹونٹی میچز کی سیریز میں حصہ لینا ہے۔ نیشنل چیمپئن شپ دورہ انگلینڈ کی تیاری کے لئے معاون ثابت ہو رہی ہے۔ سالانہ کیلنڈر میں ویمن کرکٹ کے بہت کم ٹورنامنٹ ہیں اس وجہ سے نیا ٹیلنٹ سامنے نہیں آ رہا ہے ٹورنامنٹس کی تعداد میں اضافہ کرنا ہوگا۔