لاہور (سپورٹس رپورٹر) پاکستان کرکٹ بورڈ ویمن ونگ کی چیئرپرسن بشریٰ اعتزاز کی آنے والے عام انتخابات میں مصروفیت کے باعث چیئرپرسن کے عہدہ پر نئی تقرری کے لئے امیدواروں نے بھاگ دوڑ شروع کر دی ہے۔ ذرائع کا کہنا ہے کہ پاکستان پیپلزپارٹی کی جانب سے پاکستان کرکٹ بورڈ ویمن ونگ کی چیئرپرسن کو لاہور سے انتخابات لڑانے کے فیصلے کے بعد ان کی توقع مصروفیت کے باعث کرکٹ حلقوں میں نئے نام سامنے آنا شروع ہو گئے ہیں اور کئی بااثر شخصیات کی جانب سے اس عہدے کے حصول کے لئے کوششیں تیز ہو گئی ہیں۔ ذرائع کا کہنا ہے کہ اس سلسلہ میں لاہور یونیورسٹی کی وائس چانسلر صبیحہ منصور مضبوط امیدوار جانی جا رہی ہیں جبکہ ان کے علاوہ کنیئرڈ کالج کی پرنسپل بھی عہدے کی دوڑ میں شامل ہیں۔ پاکستان کرکٹ بورڈ ویمن ونگ کی چیئرپرسن بشریٰ اعتزاز کا کہنا تھا کہ میرا عہدہ اعزازی ہے۔ ایسی باتوں میں کوئی صداقت نہیں ہے کہ کسی نئی چیئرپرسن کو یہ عہدہ دیا جا رہا ہے۔ جب میں سمجھوں گی کہ میری مصروفیات کی بناءپر ویمن کرکٹ متاثر ہو رہی ہے عہدے سے استعفٰی دے دوں گی۔