اسلام آباد (آئی این پی) ق لیگ کے صدر سینیٹر چودھری شجاعت حسین اور پیپلز پارٹی کے سینئر رہنما سید خورشید شاہ کی جے یو آئی (ف) کے سیکرٹری جنرل سینیٹر مولانا عبدالغفور حیدری کے درمیان جے یو آئی کی سیاست کے تناظر میں دلچسپ جملے بازی ہوئی، خورشید شاہ نے مولانا حیدری کو خطرناک مولوی قرار دیا تو جواب میں مولانا حیدری نے ”فدائی بھجوانے“ کی دھمکی دی۔ پارلیمانی کمیٹی کے اجلاس سے پہلے جب چودھری شجاعت حسین اور سید خورشید شاہ کا جے یو آئی (ف) کے سیکرٹری جنرل سینیٹر مولانا عبدالغفور حیدری سے آمنا سامنا ہوا تو خورشید شاہ نے مسکراتے ہوئے مولانا غفور حیدری کو خطرناک مولوی قرار دیا اور چودھری شجاعت حسین نے کہا کہ مولانا سے بچیں یہ بہت خطرناک ہے جس پر مولانا غفور حیدری نے کہا کہ خورشید شاہ آپ سنبھل جاﺅ ورنہ فدائی بھجواﺅں گا اس مرحلے پر چودھری شجاعت حسین نے کہا کہ خورشید شاہ ایسی باتیں نہ کریں ہم انہیں نشان حیدر دیں گے۔ (ق) لیگ کے صدر کے اس جملے پر غفور حیدری مسکراتے ہوئے شجاعت حسین سے بغلگیر ہو گئے۔