میامی (اے پی پی) روس کی بین الاقوامی شہرت یافتہ ٹینس سٹار اور ایونٹ کی تھرڈ سیڈ ماریا شیراپوا اٹلی کی سارہ ایرانی اور سربین جیلینا جانکووچ میامی ماسٹرز اوپن ٹینس ٹورنامنٹ کے چوتھے راﺅنڈ میں پہنچ گئیں جبکہ سوتیلانا کزنٹسوا، نادیہ پیٹروا اور ایلینا ویسنینا تیسرے راﺅنڈ میں ہار کر ایونٹ سے باہر ہو گئیں۔ ٹورنامنٹ میں کھیلے گئے تیسرے راﺅنڈ میں ماریا شیراپوا نے ہم وطن ایلینا ویسنینا کو کو سٹریٹ سیٹس میں 6-4 اور 6-2 سے ہرا کر ایونٹ کے چوتھے راﺅنڈ کیلئے کوالیفائی کر لیا۔ اٹلی کی سارہ ایرانی نے رومانیہ کی سیمونا ہیلپ کو 6-1 اور 6-0 سے ہرا دیا۔ سربیا کی سابق عالمی چیمپئن جیلینا جانکوچ نے روس کی نادیا پیٹروا کو (79) 7-6 اور 6-4 سے ہرا دیا۔ سربیا کی ہی اینا آئیوانوچ نے روس کی سوتیلانا کزنٹسوا کو ٰ6-3 اور 6-3 سے ہرا کر ایونٹ کے چوتھے راﺅنڈ کیلئے کوالیفائی کرلیا۔