لاہور+ شیخوپورہ + جلالپور بھٹیاں (نامہ نگاران+ نامہ نگاران) لاہور، شیخوپورہ، جلالپور بھٹیاں میں ٹریفک حادثات کے دوران حقیقی بہن بھائی سمیت 6 افراد جاں بحق جبکہ 4 زخمی ہوگئے۔ بتایا جاتا ہے کہ گلشن راوی کے علاقہ میں سمن آباد موڑ کا رہائشی 40 سالہ پھل فروش لیاقت موٹرسائیکل پر جا رہا تھا کہ اسے تیز رفتار کارنے ٹکر مار دی ہسپتال پہنچایا گیا مگر وہ جانبر نہ ہوسکا۔ گارڈن ٹاو¿ن کے علاقہ برکت مارکیٹ میں اتوار کے روز کار کی ٹکر سے زخمی ہونے والا 35 سالہ نامعلوم شخص گزشتہ روز جناح ہسپتال میں دم توڑ گیا۔ ادھر شیخوپورہ سرگودھا روڈ جھامکے کے قریب ویگن اور موٹرسائیکل کے تصادم کے نتیجہ میں موٹرسائیکل سوار دو شخص دم توڑ گئے۔ ہلاک ہونے والے شخص علی رضا اور گل شیر موٹرسائیکل پر شیخوپورہ آ رہے تھے کہ جھامکے کے قریب سامنے سے آنے والی تیز رفتار ویگن نے انہیں ٹکر مار دی۔ ادھر جلالپور بھٹیاں کے نواح میں رائس ملز کے قریب علی رضا، ام حبیبہ اور ان کی کزن انسہ شہزادی سکنہ حیسکی ثانی موٹرسایکل پر جلال پور بھٹیاں کی طرف آ رہے تھے کہ جلال پور بھٹیاں کی طرف سے جانے والے تیز رفتار ٹرک نے ٹکر دے ماری جس کے نتیجہ میں سکینڈ ایئر کی طالبہ ام حبیبہ اور اس کا بھائی علی رضا موقع پر جاں بحق ہوگئے جبکہ اس کی کزن انسہ شہزادی کو شدید زخمی حالت میں ہسپتال ریفر کر دیا گیا۔