اسلام آباد(آن لائن) سابق صدر جنرل (ر) پرویز مشرف نے کہا ہے کہ میں کراچی، اسلام آباد اور چترال سے انتخابات میں حصہ لوں گا۔ میں فراہم کی گئی سکیورٹی سے مطمئن ہوں۔ نواز شریف میرے آنے پر کیوں خاموش ہیں اسکا مجھے پتہ نہیں ہے۔ ان خیالات کا اظہار انہوں نے نجی ٹی وی کو انٹرویو دیتے ہوئے کیا۔ انہوں نے کہا کہ قومی و صوبائی اسمبلی کے لئے امیدوار آج فائنل ہو جائیں گے۔ میں کراچی این اے250، چترال این اے13اور اسلام آباد این اے48سے انتخابات لڑوں گا۔ لندن میں ایم کیو ایم رابطہ کمیٹی سے ملاقات ہوتی رہتی ہے۔ انہوں نے کہا کہ لال مسجد والوں نے 3پولیس اہلکاروں کو قتل کیا۔ لال مسجد آپریشن میں94دہشت گرد مارے گئے۔ رپورٹس کے مطابق لال مسجد میں غیر ملکی موجود تھے، آپریشن میں گولے نہیں گولیاں چلیں۔ انہوں نے کہا کہ تین چار دن میں اسلام آباد جانے کا ارادہ ہے۔ انہوں نے کہا کہ سکیورٹی کی ذمہ داری ریاست کے سربراہ کی نہیں ہوتی۔ کسی سیاسی جماعت کے سربراہ سے بات چیت نہیں ہو رہی۔ انہوں نے کہا کہ وطن واپسی کیلئے سعودی رہنماﺅں سے بات چیت نہیں ہوئی ہے۔
پرویز مشرف