لاہور (آئی اےن پی) پاکستان کرکٹ بورڈ نے موجودہ سلیکشن کمیٹی کے عہدے کی معیاد میں جون میں آئی سی سی چیمپئنز ٹرافی تک توسیع دینے کا فیصلہ کر لیا۔ پی سی بی کے ذرائع کے مطابق پاکستان کرکٹ بورڈ اقبال قاسم کی سر براہی میں سلیکشن کمیٹی کو مزید تین ماہ کی توسیع دے رہا ہے۔ اس دوران سلیکٹرز سکاٹ لینڈ اور آئر لینڈ اور پھر چیمپئنز ٹرافی تک ٹیم منتخب کریں گے۔ سلیکٹرز سلیم جعفر، اظہر خان اور فرخ زمان پاکستان کرکٹ بورڈ کے تنخواہ دار ملازمین ہیں جبکہ چیف سلیکٹر اقبا ل قاسم اعزازی ذمے داریاں نبھا رہے ہیں۔ گذشتہ سال پی سی بی نے قومی سلیکشن کمیٹی کا تقرر ایک سال کے لئے کیا تھا پھر سلیکٹرز کو ایک ماہ کی تو سیع دی گئی تھی۔