میامی (سپورٹس ڈیسک) امریکی سٹار سرینا ولیمز نے روسی حسینہ ماریہ شراپووا کو شکست دے کر میامی ماسٹرز اوپن ٹینس ٹورنامنٹ جیت لیا۔ سرینا ولیمز نے پہلا سیٹ ہارنے کے باوجود کم بیک کیا اور شراپووا کی ایک نہ چلنے دی۔ روسی حسینہ امریکی سٹار کی سروسز کا مقابلہ نہ کر سکی۔ سرینا ولیمز نے چار چھ، چھ تین اور چھ صفر سے کامیابی حاصل کی۔ برطانوی ٹینس سٹار اور اولمپک چیمپئن اینڈی مرے میامی ماسٹرز ٹورنامنٹ مینز سنگلز کے فائنل میں پہنچ گئے۔ فائنل میں اینڈی کا مقابلہ ڈیوڈ فیرر سے ہو گا۔ پہلے سیمی فائنل میچ میں برطانیہ کے اینڈی مرے اور فرانس کے رچرڈ گیسکوئٹ مدمقابل ہوئے، دونوں کھلاڑیوں کے درمیان کانٹے دار مقابلہ ہوا تاہم اعصاب شکن مقابلے میں اینڈی خوش قسمت رہے اور انہوں نے گیسکوئٹ کو زیر کرکے فائنل میں جگہ بنائی۔ پہلے سیٹ میں فرانسیسی کھلاڑی نے مرے کے خلاف ٹائی بریک پر 7-6 سے کامیابی سمیٹی، اینڈی نے دوسرا سیٹ 6-1 سے جیت کر جاندار کم بیک کیا، تیسرے اور فیصلہ کن سیٹ میں بھی اینڈی مکمل طور پر چھائے رہے اور انہوں نے گیسکوئٹ کو 6-2 سے ہرایا۔ ڈیوڈ فیرر نے ٹومی ہاس کو چار چھ، چھ دو اور چھ تین سے شکست دی۔