لاہور (سپورٹس رپورٹر) پی سی بی بلائنڈ ٹی ٹونٹی ٹرافی 2013ءکا لاہور اور پشاور میں آغاز ہو گیا۔ پہلے روز دونوں سنٹرز میں دو دو میچوں کا فیصلہ ہو گیا۔ لاہور میں کھیلے جانے والے پہلے میچ میں بہاولپور کی ٹیم نے اے جے کی ٹیم کو 55 رنز سے ہرا دیا۔ اس میچ میں بہاولپور نے پہلے کھیلتے ہوئے 6 وکٹوں پر 286 رنز بنائے۔ جس میں ایم بلال نے 105 نمایاں رنز بنائے۔ جواب میں اے جے کے ٹیم 8 وکٹوں پر 231 رنز ہی بنا سکی۔ ناصر علی نے 93 رنز بنائے۔ دوسرا میچ ملتان اور کوئٹہ کی ٹیموں کے درمیان کھیلا گیا جس میں ملتان نے پانچ وکٹوں سے کامیابی حاصل کی۔ اس میچ میں کوئٹہ کی ٹیم نے پہلے کھیلتے ہوئے 2 وکٹوں پر 343 رنز بنائے جس میں عزت اﷲ نے 101 اور سلیم نے 84 نمایاں رنز بنائے۔ جواب میں ملتان کی ٹیم نے ہدف 5 وکٹوں کے نقصان پر پورا کر لیا۔ زاہد نے 224 رنز کی ناقابل شکست اننگز کھیلی۔ پشاور میں کھیلے جانے والے میچز میں اسلام آباد اور گوجرانوالو کی ٹیموں نے اپنے اپنے میچز جیت لئے۔