لاہور (سپورٹس رپورٹر) پنجاب سائیکلنگ ایسوسی ایشن کے زیراہتمام منعقد ہونے والے لاہور تا قصور سائیکل ریس فریاد حسین نے جیت لی۔ پنجاب سائیکلنگ ایسوسی ایشن اور ڈسٹرکٹ سپورٹس کمیٹی قصور کے اشتراک سے منعقد ہونے والی ریس کا آغاز پنجاب سٹیڈیم لاہور سے ہوا جس میں 62 سائیکلسٹ نے حصہ لیا۔ افتتاحی تقریب کے مہمان خصوصی چودھری کامران امین تھے۔ فریاد حسین نے 45 کلو میٹر کا فاصلہ ایک گھنٹہ 18 منٹ اور 44.89 سیکنڈ میں طے کر کے اول پوزیشن اپنے نام کی۔ عظیم نوبل نے دوسری، شعمون مسیح نے تیسری، سنی انور اور ناصر خان نے چوتھی، محمد عمران نے پانچویں جبکہ عبدالرحمان نے چھٹی پوزیشن حاصل کی۔ ریس کی اختتامی تقریب کے مہمان خصوصی ڈسٹرکٹ سپورٹس آفیسر اکبر مراد تھے جنہوں نے کامیاب سائیکلسٹ میں کیش انعامات کے ساتھ ٹرافیاں تقسیم کیں۔