وہاڑی (نامہ نگار) آل پنجاب تیکوانڈو چیمپئن شپ میں وہاڑی ڈسٹرکٹ نے 45 پوائنٹ کے ساتھ پہلی پوزیشن لاہور نے 35 پوائنٹ کے ساتھ دوسری اور فیصل آباد نے25پوائنٹ کے ساتھ تیسری پوزیشن حاصل کر لی۔ تفصیلات کے مطابق گورنمنٹ کامرس کالج وہاڑی میں پنجاب تیکوانڈو ایسوسی ایشن کی زیرنگرانی ڈسٹرکٹ تیکوانڈو ایسوسی ایشن وہاڑی اور تیکوانڈولورز آرگنائیزیشن نے دو روزہ آل پنجاب تیکوانڈو چیمپئن شپ کا انعقاد کیا جس کے چیف آرگنائزرجنرل سیکرٹری ڈسٹرکٹ تیکوانڈو ایسوسی ایشن وہاڑی حاجی محمد ظفراللہ چوہدری اور سینئر نائب صدر شہزاد بھٹی تھے۔ اس چیمپئن شپ کا افتتاح ڈی پی او شاکر حسین داوڑ نے کیا۔ مہمان خصوصی ڈی سی او احسان بھٹہ، ضلعی صدر تحریک انصاف چوہدری طاہر انور واہلہ نے انعامات تقسیم کئے۔ اس چیمپئن شپ میں وہاڑی کے مزمل حسن واہلہ، بھکر کے شعیب، فیصل آباد کے وقاص لاہور کے شاہ رخ عباس، میاں چنوں کے نعمان رفیق اور فیصل آباد کے زبیر نے گولڈ میڈلز حاصل کئے۔ اس چیمپئن شپ میں لاہور، فیصل آباد، قصور، گوجرانوالہ، چنیوٹ، ملتان، بھکر، بہاولپور، میاں چنوں، ہارون آباد، چشتیاں، بہاولنگر، ساہیوال اور ڈسٹر کٹ وہاڑی کی ٹیموں نے شرکت کی۔