مردان( آئی این پی) خیبرپی کے میں ایک بار پھر پولیو ٹیمیں شرپسندوں کے نشانے پر لگیں بدھ کو مردان کے علاقے موسم کورونا میں انسداد پولیو مہم کی ٹیم پر نامعلوم شرپسندوں نے فائرنگ کردی جس کے نتیجے میں ٹیم کی سکیورٹی پر مامور ایک پولیس اہلکار جاں بحق جبکہ دوسرے کو تشویشناک حالت میں پشاور منتقل کردیا گیا۔ تفصیلات کے مطابق مردان کے نواحی علاقے موسم کورونا میں انسداد پولیو مہم کی ٹیم کو اس وقت مسلح افراد نے اپنا نشانہ بنایا جب وہ علاقے میں بچوں کو پولیو کے قطرے پلا رہی تھی۔ فائرنگ سے کانسٹیبل منیر زخموں کی تاب نہ لاتے ہوئے جاں بحق ہوگیا جبکہ دوسرے پولیس اہلکار کی تشویشناک حالت کو مدنظر رکھتے ہوئے اسے مردان سے ڈاکٹروں نے لیڈی ریڈنگ ہسپتال پشاور ریفر کردیا۔ واضح رہے کہ فروری میں مردان کے نواحی علاقے میں اسی طرح کے واقعہ میںایک پولیس اہلکار ہلاک ہوا تھا۔