لاہور (کامرس رپورٹر) پیٹرنز ٹرافی گریڈ ٹو کرکٹ ٹورنامنٹ میں پی ٹی وی نے میڈی کیم کو چار روزہ میچ میں اننگز اور 112 رنز سے شکست دے دی۔ میڈی کیم کی ٹیم دوسرے روز دونوں اننگز کھیل کر بھی پی ٹی وی کی پہلی اننگز کا سکور برابر نہ کر سکی۔ پی ٹی وی کے باﺅلرز نے تباہ کن باﺅلنگ کا مظاہرہ کرتے ہوئے میڈی کیم کو پہلی اننگز میں 164 اور دوسری میں 113 رنز پر ڈھیر کیا۔ دریں اثناءپی ٹی وی نے 389 رنز 6 کھلاڑی آﺅٹ پر اننگز ڈیکلیئر کر دی تھی۔ راولپنڈی کرکٹ سٹیڈیم میں کھیلے گئے چار روزہ میچ کے دوسرے روز میڈی کیم کی ٹیم پہلی اننگز میں عمدہ کارکردگی نہ دکھا سکی اور پوری ٹیم 164 رنز پر پویلین لوٹ گئے، فالوآن کی خفت سے دوچار ہونے کے بعد میڈی کیم کی ٹیم جب دوسری اننگز کیلئے میدان میں اتری تو پی ٹی وی کے باﺅلرز نے اسے ایک مرتبہ پھر سنبھل کر نہ کھیلنے دیا اور پوری ٹیم 113 رنز پر آﺅٹ ہو گئی۔ محمد عباس نے پانچ وکٹیں حاصل کیں۔