لاہور (سپورٹس رپورٹر) پاکستان کرکٹ بورڈ کے زیر اہتمام جاری پیٹرنز ٹرافی گریڈ II میں سید پیپرز، پی ٹی وی، کے ای ایس سی اور عمر ایسوسی ایٹ کی ٹیموں نے سیمی فائنل کے لیے کوالیفائی کر لیا ہے۔ ٹورنامنٹ کا پہلا سیمی فائنل کے ای ایس سی اور عمر ایسوسی ایٹ کے درمیان 24 سے 26 اپریل تک پنڈی کرکٹ سٹیڈیم راولپنڈی میں جبکہ دوسرا سیمی فائنل 24 سے 26 اپریل تک میرپور کرکٹ سٹیڈیم آزاد جموںکشیمر میں پی ٹی وی اور سید پیپرز کی ٹیموں کے درمیان کھیلا جائیگا۔ ٹورنامنٹ کا فائنل 29 اپریل سے 2 مئی تک میر پور کرکٹ سٹیڈیم آزاد جموں کشمیر میں کھیلا جائیگا۔ پاکستان کرکٹ بورڈ نے ٹورنامنٹ کی انعامی رقم کا اعلان کر دیا ہے۔ مجموعی طور پر 4 لاکھ روپے کے انعامات تقسیم کیے جائیں گے فاتح ٹیم کو 2 لاکھ جبکہ رنر اپ ٹیم کو ایک لاکھ روپے اور ٹرافی دی جائے گی۔