مشرف کے فارم ہاﺅس کے قریب 45 کلو بارود سے بھری گاڑی پکڑی گئی
اسلام آباد (نوائے وقت رپورٹ) سابق صدر پرویز مشرف کے فارم ہاﺅس کے قریب سے مشتبہ گاڑی پکڑی گئی، مشکوک گاڑی کو تھانہ چک شہزاد ٹاﺅن منتقل کر دیا گیا۔ ذرائع کے مطابق گاڑی فارم ہاﺅس کے باہر سی ڈی اے نرسری کے قریب کھڑی تھی۔ مشکوک گاڑی سے دھماکہ خیز مواد اور ریموٹ کنٹرول ڈیوائس برآمد کرلی گئی۔ بم ڈسپوزل سکواڈ نے 45کلو بارودی مواد ناکارہ بنا دیا۔ مشرف کے فارم ہاﺅس کے باہر پولیس کی مزید 5 چیک پوسٹیں بڑھا دی گئیں۔ فارم ہاﺅس کی سکیورٹی مزید سخت کردی گئی۔ پولیس کے مطابق گاڑی سے بڑی تعداد میں ڈیٹونیٹرز، ٹائم ڈیوائسز اور ریموٹ کنٹرول بھی برآمد کئے۔
