لوئر دیر (آن لائن + نوائے وقت نیوز) لوئر دیر میں دیرینہ عداوت پر مخالفین نے باراتیوں کی گاڑی پر فائرنگ کر دی جس کے نتیجہ میں دلہن اور 3 خواتین سمیت 5 افراد جاں بحق 2 زخمی ہو گئے۔ حملہ آور وقوعہ کے بعد فرار ہو گئے۔ پولیس کے مطابق جندول ثمر باغ سے باراتیوں کی گاڑی دلہن لے کر واپس تِتر جا رہی تھی کہ دیرینہ عداوت پر مخالفین نے ثمر باغ گرا¶نڈ کے قریب ان کی گاڑی پر اندھا دھند فائرنگ کر دی جس کے نتیجہ میں دلہن اور 3 دوسری خواتین سمیت 5 افراد موقع پر دم توڑ گئے جبکہ 2 افراد زخمی ہو گئے۔ واقعہ کے بعد ملزمان فرار ہو گئے۔ 5 افراد کے قتل پر شادی والا گھر ماتم کدہ میں تبدیل ہو گیا اور مقتولین کے رشتہ دار دھاڑیں مار مار کر روتے رہے۔ پولیس حکام کے مطابق ملزمان کا تعلق باجوڑ ایجنسی سے تھا‘ مقدمہ درج کر لیا گیا ہے۔