لاہور(خصوصی رپورٹر) مسلم لیگ(ن) کے مرکزی رہنما حمزہ شہباز نے کہا ہے کہ مسلم لیگ (ن) نہ صرف لاہور میں کلین سویپ کرے گی بلکہ پورے ملک میں فقیدالمثال کامیابی حاصل کرکے ترقی و خوشحالی کی دشمن تینوں سیاسی جماعتوں کوگھر بھیج دے گی۔ہمیں اپنی پرفارمنس کی بنیاد پر الیکشن میںکامیابی کا کامل یقین ہے پوری قوم بحرانوں سے نکلنے کے لئے انتخابات کے بروقت انعقاد کا تہیہ کئے ہوئے ہے۔ ان خیالات کا اظہار انہوں نے مسلم لیگ(ن) کے مرکزی سیکرٹریٹ میں ضلع وہاڑی کی ممتا ز روحانی شخصیت خواجہ نور محمد سہو سجادہ نشیں درگاہ صوفی اللہ دا د سہو کے اپنے ہزاروں مریدین سمیت مسلم لیگ (ن) میں شمولیت کے اعلان کے موقع پر پریس کانفرنس سے خطاب کرتے ہوئے کیا۔ انہوں نے کہا کہ خادم اعلیٰ شہبازشریف نے جس طر ح پنجاب میں عوام کو ڈینگی اور سیلابوں جیسی آفتوں سے بچانے کے لئے اپنا دن رات ایک کردیا وہ ہماری قیادت کی اہل وطن سے غیر مشروط محبت کی ان مٹ داستان ہے۔ انہوں نے کہا کہ اگرچہ عمران خان کی اخلاق سے گری گفتگوکا الیکشن کمشن نے نوٹس لے لیا ہے لیکن اس کا اصل نوٹس خود عوام 11مئی کو لیںگے۔ انہوں نے کہاکہ ان کی سیاست اخلاقی روایات کی پابند ہے اور مسلم لیگ(ن) کاترقی کا ٹریک ریکار ڈ سب کے سامنے ہے۔ عمران خان زرداری کے ہاتھوں کھلونا بنے ہوئے ہیں جس کا ثبوت یہ ہے کہ انہوں نے زرداری کو لوڈ شیڈ نگ کا ذمہ دار ٹھہرانے سے انکار کر دیا ہے حالانکہ ایک عام پاکستانی بھی اس حقیقت سے اچھی طرح باخبر ہے کہ نندی پور او رچیچوکی ملیاںکے بجلی گھروں کے لئے آنے والا سامان کراچی روک کر زرداری حکومت نے پنجاب کو اندھیر وں میں ڈبودیا اور بدحالی کی بدترین تصویر بنا ڈالا۔