فیصل آباد: ٹیکسٹائل مل کا بوائلر پھٹنے سے آگ لگ گئی، 12 ورکر جھلس گئے
فیصل آباد (نمائندہ خصوصی) ستارہ ٹیکسٹائل انڈسٹریز سرگودھا روڈ میں کوئلے کا بوائلر پھٹنے سے خوفناک آتشزدگی، 12 کے قریب ورکرز جھلس گئے۔ مبینہ طور پر دو کی حالت نازک ہے، تفصیلات کے مطابق ستارہ ٹیکسٹائل انڈسٹریز میں حسب معمول کام جاری تھا کہ اچانک کوئلے کا بوائلر پھٹ گیا جس کے باعث کپڑے کے کھاتے میں آئل گرنے سے آگ لگ گئی اور اس نے پورے کھاتے کو اپنی لپیٹ میں لے لیا۔ آتشزدگی کے باعث شیڈ بھی گر گیا اور کھاتہ میں کام کرنے والے تین افراد بے ہوش ہو گئے اور بارہ کے قریب جھلس گئے جن کو الائیڈ ہسپتال میں طبی امداد دی جا رہی ہے۔ اطلاع ملتے ہی ریسکیو1122 کی گاڑیاں فوری طور پر پہنچ گئیں اور کئی گھنٹوں کی جدوجہد کے بعد آگ پر قابو پا لیا۔ تاہم کسی قسم کا جانی نقصان نہیں ہوا البتہ لاکھوں روپے مالیت کا کپڑا جل کر خاکستر ہو گیا۔
آتشزدگی
