جوہانسبرگ (اے پی پی) جنوبی افریقہ کرکٹ ٹیم کے کپتان اور مایہ ناز بلے باز اے بی ڈی ویلیئرز نے کہا ہے کہ ٹیم اس بار چوکرز کے ٹیگ کو اتار کر 15 برس بعد آئی سی سی چیمپئنز ٹرافی کا ٹائٹل جیت لے گی۔ پروٹیز نے 1998ءمیں افتتاحی چیمپئنز ٹرافی اپنے نام کی تھی۔ آئی سی سی چیمپئنز ٹرافی کا آخری ایڈیشن آئندہ ماہ انگلینڈ میں منعقد ہو گا۔ اپنے ایک بیان میں پروٹیز قائد نے کہا کہ آئی سی سی کے ہر بڑے ایونٹ میں عمدہ کارکردگی کا مظاہرہ کرنے کے حوالے سے ہمیشہ ٹیم پر دباﺅ ہوتا ہے جس کی وجہ سے ٹیم قریب پہنچ کر بھی بازی ہار جاتی ہے لیکن اس بار وہ چیمپئنز ٹرافی جیت کر چوکرز کے ٹیگ کو اتار لیں گے۔ ابتدائی میچ میں بھارت کو شکست دے کر ایونٹ کا فاتحانہ آغاز کرنے کےلئے ٹیم پوری قوت کے ساتھ میدان میں اتاریں گے، ہماری ٹیم متوازن ہے اور اگر کھلاڑی دباﺅ کو ہینڈل کرنے میں کامیاب ہوئے تو جیت ہماری ہی ہو گی۔ ان کا کہنا ہے کہ چیمپئن شپ میں پاکستانی ٹیم خطرناک حریف ہو گی۔