اسلام آباد (این این آئی) پاکستان کرکٹ ٹیم سے ڈراپ ہونے والے سٹار کرکٹرز شاہد خان آفریدی اور عمر اکمل آئی سی سی چیمپئنز ٹرافی سے قبل شارجہ کرکٹ سٹیڈیم میں ایکشن میں دکھائی دیں گے۔ میڈیا رپورٹ کے مطابق شارجہ سٹیڈیم 20 مئی سے یکم جون تک شارجہ سکسز 2013 ءکی میزبانی کرے گا۔ شاہد آفریدی، عمر اکمل سمیت پاکستان کے کئی صف اول کے کرکٹرز اس ٹورنامنٹ میں حصہ لیں گے۔ سابق پاکستانی کپتان اور کوچ وقار یونس کو ٹورنامنٹ کا برانڈ ایمبیسڈر مقرر کیا گیا ہے۔ شارجہ کرکٹ کونسل کے تحت ہونے والے اس ٹورنامنٹ میں دنیا کے کئی ممتاز کھلاڑی ایکشن میں دکھائی دیں گے۔ شاہد آفریدی 14مئی کو دبئی روانہ ہونگے، ہانگ کانگ سکسز کی طرز پر ہونے والے اس ایونٹ میں مجموعی طور پر 30 ٹیمیں حصہ لیں گی۔ ٹورنامنٹ کی مجموعی انعامی رقم ایک لاکھ درہم ہے۔ فاتح ٹیم کو 40 ہزار درہم، رنرزاپ کو 25 ہزار درہم اور تیسرے نمبر پر آنے والی ٹیم کو 15 ہزار درہم ملیں گے۔