مسلم لیگ ن کے حامیوں کا تیسرے ر وز بھی لاہور میں جشن‘ آتشبازی‘ مٹھائیاں تقسیم
لاہور (خصوصی رپورٹر) مسلم لیگ (ن ) کی کامیابی کی خوشی میں تیسرے روز بھی مسلم لیگ (ن) کے حامیوں کا جشن جاری رہا، گلی محلوں اور دفاتر، ہائی کورٹ، سول کورٹس میں لوگوں اور وکلاءنے مٹھائیاں تقسیم کیں، ہسپتالوں میں ڈاکٹروں اور پیرا میڈیکل سٹاف نے بھی مسلم لیگ (ن) کی کامیابی پر مٹھائیاں تقسیم کیں۔ شہر کے مختلف مقامات پر آتش بازی نے بھی فتح کے جشن کو رونق بخشی۔ نوجوانوں نے گروپوں کی شکل میں موٹر سائیکلوں اور گاڑیوں میں جلوس نکالے وہ نواز شریف، شہباز شریف کی تصاویر اٹھائے ہوئے تھے۔ شیر شیر اک واری فیر شیر کے نعرے لگاتے شہر میں گشت کرتے رہے۔ مال روڈ پر منچلوں نے رات گئے تک رونق لگائے رکھی۔ مال روڈ پر نوجوانوں کا سب سے بڑا گروپ لے کر عثمان تنویر بٹ آئے جبکہ ملک محمود الحسن کی قیادت میں بھی نوجوانوں نے موٹر سائیکلوں پر جلوس نکالا۔
