شیخوپورہ(نامہ نگار خصوصی)شیخوپورہ میں موٹروے پر گندم کے کھیتوںمیں لگی ہوئی آگ کے دھواں سے موٹروے پر متعدد گاڑیاں آپس میں ٹکراگئیں جس کی وجہ سے دوافرادجاں بحق جبکہ 25 کے قریب افراد شدید زخمی ہوگئے جنہیں فوری طور پر مختلف ہسپتالوں میں منتقل کر دیا گیا۔ خانپور کے قریب گندم کے کھیتوںمیں پڑے ہوئے بھوسہ کو آگ لگادی گئی جس سے ہر طرف دھواں کے بادل چھاگئے تھے جس سے موٹر وے پر متعدد کاریں ، لگژری کوچز پیچھے سے ایک دوسرے سے ٹکراگئیں جس سے دو افراد جاں بحق جبکہ 25 کے قریب افراد زخمی ہوگئے۔ موٹروے پولیس کے ایس ایس پی اطہر خاں نے بتایا موٹروے کی طرف سے متعلقہ اضلاع کے ڈی پی او ز اور ڈی سی او ز کو مراسلہ بھجوایا گیا ہے گندم کے کھیتوں میں آگ لگانے سے زمینداروں کو روکا جائے لیکن کسی قسم کی کاروائی نہیں کی گئی تاہم اس واقعہ کی ایف آئی آر ہم متعلقہ زمیندار کے خلاف درج کروائیں گے جبکہ عینی شاہدین کے مطابق امدادی ٹیمیں حادثہ کے 45 منٹ پر وہاں پر پہنچیں زخمی ہونیوالا بس ڈرائیور فوری طبی امداد نہ ملنے کی وجہ سے سسک سسک کر جان کی بازی ہار گیا لوگ اپنی مدد آپ کے تحت امداد کام کرتے رہے اور ایک دوسرے کو دلاسہ دینے کیساتھ ساتھ منہ میں پانی ڈالتے رہے۔
گاڑیاں ٹکرا گئیں/ 2 جاں بحق