ملتان (نمائندہ نوائے وقت) سابق وزیراعظم یوسف رضا گیلانی کے صاحبزادے علی حیدر گیلانی کے اغوا اور عدم بازیابی کے خلاف ملتان میں احتجاجی مظاہرہ کیا گیا، پیپلزپارٹی انسانی حقوق ونگ کے زیر اہتمام مل مظفر آباد چوک پر مظاہرے کی قیادت انسانی حقوق ونگ پنجاب کے صدر سلیم الرحمن میو نے کی، مظاہرین نے اپنے مطالبات کے حق میں پلے کارڈز اٹھا رکھے تھے جن پر علی حیدر گیلانی کو بازیاب کرو نجم سیٹھی اپنی ذمہ داری پوری کرو دہشت گردی مردہ باد کے نعرے درج تھے ، سلیم الرحمن میو‘ مرزا نذیر بیگ اور ملک سعید اختر نے کہا پنجاب حکومت کی ناکامی ہے جس پر نگران وزیراعلیٰ پنجاب نجم سیٹھی کو مستعفی ہو جانا چاہئے ، مظاہرین نے سید یوسف رضا گیلانی سے پارٹی سینئر وائس چیئرمین عہدہ سے استعفیٰ بھی واپس لینے کا مطالبہ کیا۔