برمنگھم (آئی اےن پی) پاکستان کرکٹ ٹیم کے کپتان مصباح الحق نے چیمپئنز ٹرافی میں جیت کا جذبہ ظاہر کر دیا۔ برمنگھم میں پریس کانفرنس کر تے ہوئے انہوں نے کہا کہ ایونٹ میں ہر ٹیم کا ڈٹ کر مقابلہ کریں گے۔ روایتی حریف بھارت سے جوڑ اعصاب شکن ہو گا۔ قومی قائد نے کہا کہ چیمپئنز ٹرافی میں تمام ٹیمیں سخت ہیں۔ شائقین کو اچھی کرکٹ دیکھنے کو ملے گی۔روایتی حریف پاکستان اور بھارت کے مقابلے کو خاص اہمیت دیتے ہوئے مصباح الحق نے کہا کہ یہ مقابلہ کھلاڑیوں کے لیے بھی اعصاب شکن ہوتا ہے۔مصباح الحق کا کہنا تھا کہ چیمپئنز ٹرافی ورلڈکپ کے بعد کرکٹ کا سب سے بڑا ایونٹ ہے۔اس کے ہر میچ میں بہترین کمبی نیشن کے ساتھ میدان میں اتریں گے۔قومی کرکٹ ٹیم کے کپتان نے کہا کہ آئرلینڈ کے خلاف سیریز میں جیت سے ٹیم کا مورال بلند ہے۔سات جون سے وہ اپنی کامیاب مہم شروع کریں گے۔