کوئٹہ (بیورو رپورٹ+آن لائن)کوئٹہ کے علاقہ مستونگ میں نامعلوم افراد نے فائرنگ کر کے افغانستان سے آنیوالے نیٹو کے دو کنٹینرز کو آگ لگا کر تباہ کر دیا۔ لیویز کے مطابق کنٹینر پر افغانستان سے آنے کے بعد چمن سے کراچی جا رہے تھے کہ دشت کے علاقے میں نامعلوم مسلح افراد نے حملہ کردیا۔تا ہم خوش قسمتی سے کوئی جانی نقصان نہیں ہوا فائر بریگیڈ کے عملے نے موقع پر پہنچ کر آگ پر قابو پا لیا۔ لیویز نے نامعلوم افراد کے خلاف مقدمہ درج کرکے مزید کارروائی شروع کردی۔ادھر بلوچستان کے علاقے پسنی میں نامعلوم مسلح افراد نے فائرنگ کرکے 2 افراد کو قتل کردیا پسنی کے علاقے زراعت کالونی میں برکت علی اور انیل کمرے میں بیٹھے ہوئے تھے کہ نامعلوم افراد نے ان پر اندھا دھند فائرنگ کردی۔ علاوہ ازیں بلوچستان کے علاقے جیونی میں نوجوان سمندر میں ڈوب کر جاں بحق ہوگیا۔ کراچی کا رہائشی خالد علی کشتی میں تیل لینے جیونی گیا کہ راستے میں کشتی ڈوب گئی۔آئی این پی کے مطابق سکیورٹی فورسز نے مختلف کارروائیوں میں سرچ آپریشن کے دوران 9 مشتبہ افراد کو گرفتار کرکے تفتیش شروع کردی۔