لاہور (سپورٹس رپورٹر) تیسری پی ایچ ایف انٹراکیڈمی ہاکی چیمپئن شپ کا ایبٹ آباد میں آغاز ہو گیا۔ پہلے فیصل آباد، سیالکوٹ اور پشاور کی ٹیموں نے اپنے اپنے میچز جیت لئے جبکہ کراچی ون اور کوئٹہ کی ٹمیوں کے درمیان میچ برابر رہا۔ تفصیلات کے مطابق ایبٹ آباد میں کھیلی جانے والی چیمپئن شپ کا پہلا میچ فیصل آباد اور بہاولپور کی ٹیموں کے درمیان کھیلا گیا جس میں فیصل آباد کی ٹیم نے پانچ صفر سے کامیابی حاصل کی۔ دوسرا میچ کراچی ون اور کوئٹہ کی ٹیموں کے درمیان کھیلا گیا جو ایک ایک گول سے برابر رہا۔ تیسرے میچ میں سیالکوٹ نے بنوں اکیڈمی کو دو ایک سے مات دی جبکہ چوتھے میچ میں پشاور نے ایبٹ آباد اکیڈمی کے خلاف تین ایک سے کامیابی اپنے نام کی۔ چیمپئن شپ میں آج مزید چار میچ کھیلے جائیں گے۔ فیصل آباد کا مقابلہ کراچی II سے، گوجرہ کا مقابلہ بہاولپور سے، بنوں کا مقابلہ کوئٹہ سے جبکہ لاہور اور سیالکوٹ کی ٹیمیں مدمقابل ہونگی۔