لاہور (سپورٹس رپورٹر) قومی ٹیم کے مزید 7 کھلاڑی چیمپئنز ٹرافی میں شرکت کرنے کے بعد وطن واپس پہنچ گئے۔ وطن واپسی پر ائرپورٹ پر میڈیا سے بات کرتے ہوئے قومی ٹیم کے کوچ واٹمور خاصے مایوس دکھائی دئیے۔ صحافیوں سے گفتگو کرتے ہوئے کوچ واٹمور نے کہا کہ چیمپئنز ٹرافی میں قومی کرکٹ ٹیم کے کھلاڑیوں نے بری پرفارمنس دی، ایونٹ کے دوران بلے بازوں کی کارکردگی دیکھ کر بہت مایوسی ہوئی۔ انہوں نے کہا کہ چیمپئنز ٹرافی میں مایوس کن کارکردگی کے بعد ٹیم میں تبدیلیاں ہونی چاہئیں اور ٹیم میں تبدیلیوں کی ذمہ داری سلیکشن کمیٹی کی ہے۔ دریں اثناءلاہور پہنچنے پر پاکستان کرکٹ ٹیم کے کسی کھلاڑی نے میڈیا سے بات چیت نہیں کی۔ انگلینڈ سے وطن واپس آنے والے کھلاڑیوں میں سعید اجمل، کامران اکمل، ناصر جمشید، محمد عرفان، احسان عادل، وہاب ریاض اور عمران فرحت شامل ہیں۔