لاہور (سپورٹس رپورٹر) ہاکی ورلڈ لیگ کے سلسلہ میں کھیلے گئے پریکٹس میچ میں پاکستان ٹیم کو ارجنٹینا کے ہاتھوں ایک صفر سے شکست کا سامنا کرنا پڑا۔ ملائیشیا کے شہر جوہر بارو میں گذشتہ روز پاکستان اور ارجنٹینا کی ٹیموں کے درمیان 25، 25 منٹ کے دو ہاف پر مشتمل میچ کھیلا گیا جس میں ارجنٹینا کی ٹیم نے صفر کے مقابلے ایک گول سے کامیابی حاصل کی۔ پاکستان ہاکی ٹیم کے کوچ اجمل لودھی نے نوائے وقت کے ساتھ گفتگو کرتے ہوئے بتایا کہ پریکٹس میچ میں کھلاڑیوں نے اچھے کھیل کا مظاہرہ کیا ہے امید ہے کہ آج جرمنی کے خلاف کھیلے جانے والے میچ میں کھلاڑی مزید اچھا کھیل پیش کرینگے۔ ان کا کہنا تھا کہ پاکستان ٹیم کے لئے یہ ٹورنامنٹ بڑا اہمیت کا حامل ہے جس میں اچھے نتائج سے ہی پاکستان ٹیم ورلڈکپ 2014ءکے لئے کوالیفائی کرنے میں کامیاب ہو سکے گی۔