اسلام آباد (اے پی پی) قومی کرکٹ ٹیم کے مایہ ناز سپین باﺅلر سعید اجمل نے کہا ہے کہ انگلینڈ میں کھیلی گئی آئی سی سی چیمپئنز ٹرافی میں قسمت نے ساتھ نہیں دیا تاہم وہ توقع رکھتے ہیں کہ انٹرنیشنل مقابلوں میں بہت جلد عمدہ کارکردگی کا مظاہرہ کرکے اپنا کھویا ہوا مقام حاصل کریں گے۔ اپنے ایک انٹرویو میں انہوں نے کہا کہ آئی سی سی چیمپئنز ٹرافی میں تمام کھلاڑی باصلاحیت تھے تاہم بدقسمتی سے قومی ٹیم تمام میچ ہار گئی۔ وہ توقع رکھتے ہیں کہ قومی ٹیم بہت جلد انٹرنیشنل مقابلوں میں کامیابیاں حاصل کرکے دوبارہ اپنا کھویا ہوا مقام حاصل کریگی۔ ایونٹ میں ہر کھلاڑی نے جیتنے کے لئے کوشش کی تھی لیکن وہاں کی کنڈیشن مختلف تھی اور قسمت نے بھی ساتھ نہیں دیا ۔ دورہ ویسٹ انڈیز میں قومی ٹیم اپنی غلطیوں پر قابو پا کر نئی حکمت عملی کے ساتھ میدان میں اترے گی۔