دوحہ (نیوز ایجنسیاں+رائٹرز) افغان طالبان نے قطر میں اپنا سیاسی دفتر عارضی طور پر بند کر دیا ہے۔ غیرملکی خبررساں ادارے کے مطابق طالبان کی جانب سے جاری بیان میں کہا گیا ہے کہ دوحہ میں قائم دفتر کو جھنڈا لگانے کی اجازت نہ دینے کے بعد احتجاجاً بند کیا گیا ہے۔ طالبان اہلکار کا کہنا تھا کہ دوحہ میں دفتر کھولنے کا مقصد امن بات چیت کیلئے سہولت فراہم کرنا تھا اور دفتر میں جھنڈا لگانے کی اجازت نہ دینے پر یہ دفتر عارضی طور پر بند کیا گیا ہے۔ خلیج ٹائمز کی رپورٹ کے مطابق تقریباً ایک ماہ قبل امریکہ اور طالبان کے درمیان امن مذاکرات کے لئے قطر میں دفتر کھول دیا گیا تھا۔ کرزئی حکومت نے دفتر پر اسلامک امارات افغانستان کی تختی اور جھنڈا نصب کرنے پر سخت اعتراضات اٹھائے تھے جسے بعدازاں وہاں سے ہٹایا گیا۔ دوحہ میں مغربی سفارتکار نے کہا بحران کے حل کا کوئی راستہ تلاش کرنے کیلئے طالبان کے دفتر بند کرنے کے باوجود مذاکرات جاری رہنے چاہئیں۔