مکرمی! ہم اہالیان زبیدہ پارک گذشتہ چند سالوں سے گیس کی شدید قلت کی وجہ سے بہت پریشان تھے۔ اسکی سب سے بڑی وجہ شاید ہمارے قرب و جوار میں چار سی این جی فلنگ اسٹیشن کا وجود بھی ہو۔گیس کی مشکلات کے ازالہ کیلئے مین پائپ لائن سے چار انچ کا پائپ ڈال کر لیرک روڈ کے کارنر تک بہتری کا اہتمام کیا۔ پائپ جوڑنے کیلئے تمام تنصیبات تو مکمل کی گئیں مگر تاحال اس کو لیرک روڈ کی موجودہ پائپ لائن سے جوڑانہیں گیا۔ ابھی موسم سرما کی آمد نہیں ہوئی مگر ہم گیس کی قلت کی وجہ سے مشکلات کا شکار ہیں۔ حتیٰ کہ پہلے روزہ کو افطاری اور سحری کے اوقات میں گیس نہیں تھی۔ ہم جناب سردار ایازصادق صاحب سے ملتمس ہیں کہ وہ اپنے ہاتھوں گیس کنکشن کا افتتاح فرمائیں تاکہ ہمارے مسائل کا اختتام ہو۔ (پروفسیر محمد مظہر عالم و دیگر اہلیان زبیدہ پارک ملتان روڈ‘ نزدیک لیرک روڈ لاہور۔)