کراچی (نوائے وقت نیوز) جعلی اور پراسرار نمبر پلیٹ لگی گاڑیاں کراچی میں سکیورٹی رسک بن گئیں۔ خاص طور پر شہر کے ریڈ زون میں مشکوک اور غیر قانونی نمبر پلیٹ کی گاڑیوں کی سرعام آمد و رفت ہے۔ انتہائی سکیورٹی رسک بنی ان گاڑیوں یا ان کے سواروں کے خلاف کوئی کارروائی نہیں کرتا۔ نجی ٹی وی کی رپورٹ کے مطابق اس مجرمانہ عمل میں خفیہ اور حساس اداروں کے افسران اور اہلکار زیادہ ملوث دیکھے جارہے ہیں۔ جو اپنی سکیورٹی کا بہانہ کرکے اصل نمبر پلیٹس استعمال نہیں کرتے۔موٹرسائیکل کی نمبر پلیٹ کاروں جبکہ کار کی نمبر پلیٹ لینڈ کروزر اور پجارو جیپ کی نمبر پلیٹ کار پر استعمال کی جا رہی ہے۔ تاہم اس ساری صورتحال پر پولیس خاموش تماشائی بنی بیٹھی ہے۔