کریک ڈاﺅن جاری، راولپنڈی میں 2 سی این جی سٹیشنوں پر گیس چوری پکڑی گئی
راولپنڈی+ لاہور (وقائع نگار خصوصی+ نامہ نگاران) بجلی اور گیس چوروں کیخلاف کریک ڈاﺅن گذشتہ روز جاری رہا۔ راولپنڈی میں کمرشل مارکیٹ کے 2 سی این جی سٹیشنوں پر چھاپہ مارکر کروڑوں روپے کی گیس چوری پکڑ لی گئی۔ مالکان کو گرفتار کرکے مقدمات درج کرلئے گئے۔ گذشتہ روز کمرشل مارکیٹ راولپنڈی میں چھاپہ مارکر میٹر ٹمپرنگ کے ذریعے گیس چوری میں ملوث یونیک سی این جی اور نیشنل سی این جی کے گیس کنکشن منقطع کرکے مالکان کو موقع پر گرفتار کر لیا گیا۔ علاوہ ازیں ٹاسک فورس نے ایک سوسائٹی میں بھی چھاپہ مارکر 6 غیرقانونی گھریلو کنکشن بھی منقطع کردئیے جبکہ ملوث افراد کیخلاف ایف آئی آر درج کروا دی گئی ہے۔ تاندلیانوالہ کے قصبہ گڑھ کے مختلف دیہات میں واپڈا ٹیموں نے کئی بجلی چوروں کو رنگے ہاتھوں پکڑ لیا۔ سیالکوٹ میں کور پور کے شعبان کیخلاف بجلی چوری کا مقدمہ درج کر لیا گیا ہے۔
