سٹاک ہوم (اے پی پی) جرمنی نے مسلسل چھٹی بار یوئیفا ویمنز فٹ بال چیمپئن شپ کا ٹائٹل اپنے نام کر لیا۔ فیصلہ کن معرکے میں جرمنی کی ویمن ٹیم نے ناروے ویمن کو سخت مقابلے کے بعد 1-0 سے شکست دی، گول کیپر نیدائن اینگرر نے دو پینلٹی روک کر جرمنی کی جیت میں اہم کردار ادا کیا۔ تفصیلات کے مطابق یوئیفا ویمنز فٹ بال چیمپئن شپ کا فائنل جرمنی اور ناروے کی ٹیموں کے درمیان فرینڈز ارینا فٹ بال سٹیڈیم میں کھیلا گیا، پہلے ہاف میں دونوں ٹیموں کے درمیان کانٹے کا مقابلہ ہوا اور کوئی بھی ٹیم گول سکور نہ کر سکی، 29 ویں منٹ میں ناروے کو پینلٹی ملی مگر وہ فائدہ نہ اٹھا سکی۔ دوسرے ہاف کے چوتھے منٹ میں جرمنی کی انجا میٹاگ نے گول کرکے اپنی ٹیم کو ایک گول کی سبقت دلا دی جو آخر تک قائم رہی۔ ناروے کی ٹیم کو 61 ویں منٹ میں ایک بار پھر پینلٹی ملی تاہم اسے بھی جرمنی کی گول کیپر نیدائن اینگرر نے ناکام بنا دیا۔ اس طرح جرمنی نے میچ 1-0 سے جیت کر مسلسل چھٹی بار یوئیفا ویمنز چیمپئن شپ جیت لی۔