گجرات (نامہ نگار) کٹڑا بازار میں دو متحارب گروپوں کے درمیان فائرنگ کے نتیجہ میں اٹلی پلٹ نوجوان بابر بٹ عرف صوبو اور ایک پولیس اہلکار سلیم شاہ جاں بحق ہو گئے جبکہ مقتول بابر بٹ کا دوسرا بھائی ہارون اور ناصر بٹ شدید زخمی ہو گئے۔ اطلاعات کے مطابق افطاری سے چند منٹ قبل کٹڑا بازار کے رہائشی دو گروپوں کے درمیان جھگڑا ہوا جس کے بعد ایک گروپ نے فائرنگ کر دی جس کے نتیجہ میں بابر بٹ اور کانسٹیبل سلیم شاہ دم توڑ گئے جبکہ ناصر بٹ اور ہارون نامی نوجوان زخمی ہو گیا۔ پولیس کی بھاری نفری جائے وقوعہ پر پہنچ گئی اور نعشوں اور زخمیوں کو عزیز بھٹی ہسپتال پہنچا دیا۔ ڈی پی او گجرات علی ناصر رضوی ہسپتال پہنچ گئے۔ مقتول بابر بٹ اور زخمی ہارون بٹ پی پی پی کے سابق کونسلر و ممتاز صنعتکار یوسف گل کے بھتیجے بتائے جاتے ہیں۔