لاہور (سپورٹس رپورٹر) دورہ زمبابوے کےلئے اعلان کردہ قومی سکواڈ کے کھلاڑی تینوں فارمیٹ میں کامیابی کے لئے پُرامید ہیں۔ کھلاڑیوں کا کہنا ہے کہ ویسٹ انڈیز کے بعد زمبابوے کو اس کے ہوم گراونڈ پر شکست دیکر قوم کو عید کی خوشیوں کا تحفہ دینگے۔ اظہر علی، صہیب مقصود اور اسد علی کا نیشنل کرکٹ اکیڈمی میں میڈیا سے گفتگو کرتے ہوئے کہنا تھا کہ ویسٹ انڈیز کی طرح زمبابوے کی ٹیم کے خلاف بھی اچھی پرفارمنس دینے کی کوشش کریں گے۔ اس کامیابی سے نہ صرف ٹیم کے کھلاڑیوں کے مورال میں اضافہ ہو گا بلکہ متحدہ عرب امارات مےں جنوبی افریقہ اور سری لنکا کے خلاف سیریز کیلئے بھی پریکٹس ملے گی۔ زمبابوے کے خلاف ٹیسٹ، ون ڈے اور ٹی ٹونٹی میں انفرادی پرفارمنس بھی دکھائیں گے۔ کیمپ میں فزیکل فٹنس بہتر بنانے پر توجہ دے رہے ہیں۔ قومی کرکٹرز نے کیش پرائز ملنے پر خوشی کا اظہار کرتے ہوئے کہا کہ پی سی بی کا کھلاڑیوں کےلئے انعامات کا اعلان قابل تعریف ہے اس سے کھلاڑیوں کی حوصلہ افزائی ہوئی ہے۔