لاہور (سپورٹس رپورٹر) پاکستان کرکٹ بورڈ نے انٹر ڈسٹرکٹ سینئر ٹیموں کی تشکیل کے لئے ایل سی سی اے کی زونل سلیکشن کمیٹوں کو ختم کرتے ہوئے اظہر خان کی سربراہی میں نئی سلیکشن کمیٹی تشکیل دے دی جو ایسٹ، نارتھ اور ویسٹ زون کرکٹ ایسوسی ایشنز کے ٹرائلز کا انعقاد کرے گی۔ نئی سلیکشن کمیٹی میں اظہر خان کے علاوہ سابق چیف سلیکٹر پی سی بی محمد الیاس اور ہیڈکوچ لاہور ریجن محسن کمال شامل ہیں۔ اس سلسلہ میںکمیٹی کا اجلاس گذشتہ روز ایزد حسین چیئرمین عبوری کمیٹی ایل سی سی اے کی زیرصدارت منعقد ہوا اور سلیکشن کے طریقہ کار پر غور کیا گیا۔ اجلاس میں فیصلہ کیا گیا کہ ایل سی سی اے کے تمام فعال اور غیرفعال کلبز کو یکساں مواقع فراہم کئے جائیں گے اور ہر کلب کے 5,5 لڑکے ٹرائلز میں شرکت کے اہل ہوں گے۔ تمام کلبز کو ہدایت جاری کر دی گئی ہے کہ وہ اپنے لیٹر ہیڈ پر اپنے کھلاڑیوں کی فہرست 23 اگست تک ایل سی سی اے میں میڈیا منیجر ایل سی سی اے عابد حسین کو جمع کرائیں۔