نیویارک (اے پی پی) سال کا چوتھا اور آخری گرینڈ سلام یو ایس اوپن ٹینس ٹورنامنٹ امریکہ میں شروع ہوگیا۔ میگا ایونٹ میں دنیائے ٹینس کے نامور مرد و خواتین کھلاڑی مختلف کیٹگریز میں ٹائٹل کے حصول کے لیے پنجہ آزمائی کرینگے۔ اینڈی مرے مینز اور سرینا ولیمز ویمنز سنگلز ٹائٹلز کے دفاع کےلئے کورٹ میں اتریں گی۔ امریکہ کی ٹاپ سیڈ جوڑی مائیک برائن اور باب برائن مینز ڈبلز ٹائٹل کے دفاع کیلئے قسمت آزمائی کریں گے۔ یہ یو ایس اوپن کا 133 واں ایڈیشن ہے جس میں کھلاڑیوں کے درمیان مینز سنگلز، ویمنز سنگلز، مینز ڈبلز، ویمنز ڈبلز، مکسڈ ڈبلز، بوائز سنگلز، گرلز سنگلز، بوائز ڈبلز، گرلز ڈبلز، ویل چئرمین مینز سنگلز، ویل چیئرمین ویمنز سنگلز، ویل چیئر مینز ڈبلز اور ویل چیئرمین ویمنز ڈبلز کے مقابلے ہوں گے۔ برطانیہ کے اینڈی مرے مینز سنگلز، امریکہ کی ٹینس سٹار سرینا ولیمز ویمنز سنگلز، باب برائن اور مائیک برائن پر مشتمل امریکن جوڑی مینز ڈبلز، سیرا ایرانی اور روبرٹا وینسی پر مشتمل اٹالین جوڑی ویمنز ڈبلز، روس کی ایکاترینا اور ان کے برازیلین جوڑی دار برونو سورز مکسڈ ڈبلز ٹائٹل کے دفاع کےلئے کورٹ میں اتریں گے۔ واضح رہے کہ ایونٹ 9 ستمبر کو اختتام پذیر ہو گا۔