لاہور (سپورٹس رپورٹر) ملائیشیا کے شہر ایپو میں جاری نویں ایشیا کپ ہاکی ٹورنامنٹ کے دونوں سیمی فائنل کل بروز جمعہ کو کھیلے جائیں گے۔ پہلا سیمی فائنل پاکستان اور کوریا کے درمیان ہوگا جبکہ دوسرے سیمی فائنل میں بھارت کا مقابلہ میزبان ملائیشیا سے ہوگا۔ پاکستان ٹیم نے ٹورنامنٹ کے اپنے تینوں لیگ میچ جیت کر پول میں نمبر ون پوزیشن حاصل کر رکھی تھی جبکہ کوریا کی ٹیم پول بی میں نمبر دو پر رہی جس کی بناءپر اس کا مقابلہ پاکستان سے ہوگا۔ پول بی میں نمبر ون پوزیشن حاصل کرنے والی بھارت کی ٹیم کا مقابلہ پول اے کی نمبر دو پوزیشن حاصل کرنے والی ملائیشیا کی ٹیم سے ہوگا۔ قومی ہاکی ٹیم کے کپتان ایم عمران کا کہنا ہے کہ کوریا کی ٹیم آسان حریف نہیں ہے کامیابی کا سلسلہ برقرار رکھنے کے لئے میچ میں آل آ¶ٹ جائیں گے۔ قومی کپتان کا کہنا تھا کہ پاکستان کے تمام کھلاڑیوں کا مورال بلند ہے، انشااﷲ قوم کی توقعات پر پورا اترنے کی کوشش کرینگے۔