کراچی (سٹاف رپورٹر) مسلم لیگ (ن) کے رہنما لیاقت جتوئی نے کہا ہے کہ سندھ میں مسلم لیگ (ن) میں کوئی فارورڈ بلاک بن رہا ہے نہ ہی سندھ میں پارٹی رہنمائوں کے درمیان عہدوں سے مستعفی ہونے کا کوئی معاملہ چل رہا ہے۔ کراچی سمیت صوبے بھر میں امن کے لیے تمام سیاسی قوتوں کو اپنا کردار ادا کرنا ہوگا۔ پیپلز پارٹی سندھ میں مسلم لیگ (ن) کیخلاف انتقامی کارروائیوں کا سلسلہ فوری طور پر بند کرے۔ ان خیالات کا اظہار انہوں نے اپنی رہائشگاہ پر مسلم لیگ (ن) کے رہنمائوں کے اجلاس کے بعد میڈیا سے بات چیت کرتے ہوئے کیا۔ اجلاس میں سندھ کی سیاسی صورتحال، صوبے میں پارٹی کے تنظیمی معاملات سمیت دیگر امور پر غور کیا گیا۔ اجلاس میں محمد اسماعیل راہو، شاہ محمد شاہ، شفقت شاہ شیرازی، ایاز شاہ شیرازی، ڈاکٹر بدر چنا اور دیگر رہنمائوں نے شرکت کی۔