شیخوپورہ +حافظ آباد+ چکوال+ بھیرہ (نامہ نگار خصوصی+ نمائندہ نوائے وقت+ نامہ نگاران) شیخوپورہ ، چکوال اور حافظ آباد میں گوجرانوالہ روڈ پر ٹریفک حادثات میں ماں بیٹی سمیت 10 افراد جاں بحق متعدد زخمی ہوگئے۔ شیخوپورہ سے فیصل آباد جانے والی تیز رفتار مسافر بس سامنے سے آنیوالے ٹرک سے ٹکرا گئی، ایک بچی سمیت 4 مسافر جاں بحق اور16زخمی ہوگئے۔ پولیس کے مطابق حادثہ نواں کوٹ گاو¿ں کے قریب پیش آیا۔ زخمیوں کو طبی امداد کیلئے ڈی ایچ کیوہسپتال منتقل کر دیا گیا، پولیس نے مقدمہ درج کرلیا۔ پٹرولنگ پولیس کے موثر گشت نہ ہونے کی وجہ سے اکثر گاڑیاں تیز رفتاری اور لاپرواہی کے باعث ٹکرا جاتی ہیں۔ زخمیوں میں سے متعدد کی حالت تشویشناک ہے۔ دوسری جانب گوجرانوالہ روڈ پر بس اور ٹرک میں تصادم کے نتیجہ میں ماں، بیٹی جاں بحق جبکہ 20 سے زائد افراد زخمی ہو گئے۔ ریسکیو 1122 نے زخمیوں کو ڈسٹرکٹ ہسپتال منتقل کر دیا جن میں سے3 زخمیوں کی حالت نازک بتائی جاتی ہے۔ حادثہ کا شکار بس میلہ میں شرکت کےلئے مریم آباد جا رہی تھی۔ راولپنڈی سے مریم آباد میلہ میں شرکت کےلئے مسافر بس آرہی تھی گوجرانوالہ روڈ پر سلیم پورہ کے قریب مخالف سمت سے آنے والے ٹرک سے ٹکرا گئی۔ راولپنڈی کی خاتون تانیہ اور اسکی دو سالہ بیٹی ستائش موقع پر ہی ہلاک ہو گئیں جبکہ نوید، شہناز، سونیا، مریم، آسیہ، مارگریٹ، نانک، ایلس بی بی، سموئیل، وکی، مریم اور بلال سمیت 20سے زائد افراد زخمی ہو گئے۔ علاوہ ازیں چکوال تھانہ نیلہ پولیس کے علاقہ میں موٹروے پر بس الٹ جانے کے باعث چار افراد جاں بحق اور درجنوں زخمی ہو گئے۔ حادثہ تیز رفتاری کے باعث پیش آیا۔