اسلام آباد (این این آئی) مشیرخارجہ و قومی سلامتی سرتاج عزیز نے یقین ظاہر کیا ہے کہ پاک فوج کی عظیم قربانیوں کے نتیجہ میں انتہا پسندی اور دہشتگردی کو شکست دینے کا قومی عزم مزید مستحکم ہوگا۔ دفترخارجہ سے جاری بیان کے مطابق سرتاج عزیز نے چیف آف آرمی سٹاف جنرل اشفاق پرویز کیانی کے نام تعزیتی پیغام میں اپنی اور وزارت خارجہ کی جانب سے اپردیر میں پیش آنیوالے المناک سانحہ پر دلی تعزیت کا اظہار کیا جس میں میجر جنرل ثناءاللہ خان نیازی ، لیفٹیننٹ کرنل توصیف اور لانس نائیک عرفان ستار شہید ہوگئے۔ اپنے پیغام میں مشیر قومی سلامتی وخارجہ امور نے اس یقین کا اظہار کیاکہ پاکستان کی فوج اور قانون نافذ کرنیوالے اداروں کے اہلکاروں کی جانب سے دی جانیوالی عظیم قربانیوں کے نتیجہ میں انتہاپسندی اور دہشتگردی کی لعنت کو شکست دینے کیلئے ہماری قوم کا عزم مزید مستحکم ہوگا۔سرتاج عزیز نے سوگوار خاندانوں کے ساتھ تعزیت کا اظہار بھی کیا۔