لندن+ کراچی (نوائے وقت نیوز+ سٹاف رپورٹر) پی آئی اے کے پائلٹ کو بریڈ فورڈ ائرپورٹ سے گرفتار کر لیا گیا۔ برطانوی پولیس کے مطابق پائلٹ نشے میں دھت تھا۔ پاکستان پائلٹ پر ایوی ایشن قوانین کی خلاف ورزی اور 180 جانوں کو خطرے میں ڈالنے کا الزام ہے۔ پائلٹ کو طیارے کے کاک پٹ سے گرفتار کیا گیا۔ ویسٹ بار شاک پولیس نے پائلٹ کی گرفتاری کی تصدیق کی ہے، اسے آج عدالت میں پیش کیا جائیگا۔ علاوہ ازیں پی آئی اے کے ترجمان مشہود تاجور کے مطابق پی کے 776 کے پائلٹ کو رولز کی خلاف ورزی پر فوری طور پر معطل کر دیا گیا ہے۔ ترجمان پی آئی اے کے مطابق کپتان کے خلاف یہ کارروائی ابتدائی رپورٹ ملنے کے بعد کی گئی ہے۔ ترجمان کا کہنا ہے کہ برطانوی حکام کی جانب سے تفصیلی رپورٹ ملنے کے بعد مزید کارروائی کی جائے گی۔