یہ حشر کیوں مچا ہے کوئی پوچھتا نہیں ۔۔۔ کیا کس کا مدعا ہے کوئی پوچھتا نہیں
ہر آدمی کو فکر ہے اپنے چراغ کی ۔۔۔ کس کا دِیا بجھا ہے کوئی پوچھتا نہیں
بھتہ وصولیاں ہیں نگاہوں کے سامنے ۔۔۔ کیا کون کر رہا ہے کوئی پوچھتا نہیں
آیا ہے جو پڑوس میں وہ کون شخص ہے ۔۔۔ اچھا ہے یا بُرا ہے، کوئی پوچھتا نہیں
اک لُوٹ سی ہے کوچہ و بازار میں مچی ۔۔۔ جو چاہے لُوٹتا ہے کوئی پوچھتا نہیں
ہے موت کے ہدف پہ یہاں سب کی زندگی ۔۔۔ کس کا قصور کیا ہے، کوئی پوچھتا نہیں
تھا فرض جن کا جاگنا وہ سو رہے ہیں سب ۔۔۔ کیا کوئی جاگتا ہے کوئی پوچھتا نہیں
کس کس کی آنکھ نم ہے کسی کو نہیں خیال ۔۔۔ کس کس کا دل جلا ہے کوئی پوچھتا نہیں
سہمے ہوئے ہیں لوگ یہاں کس کے خوف سے ۔۔۔ وہ کون سی بلا ہے کوئی پوچھتا نہیں
یہ شہر روشنی تھا، یہاں تیرگی ہے کیوں ۔۔۔ یہ کس کی بددعا ہے کوئی پوچھتا نہیں
شدت محبتوں میں وہ راجا نہیں رہی ۔۔۔ دہشت کی انتہا ہے کوئی پوچھتا نہیں