گوجرانوالہ (نمائندہ خصوصی) خواجہ سراﺅں کی سالگرہ تقریب ”بیگانے گریا“ چھیڑ خانی کے باعث میدان جنگ بن کر رہ گئی،فائرنگ اور بھگدڑ کے دوران 4 خواجہ سراﺅں سمیت متعدد افراد زخمی ہوگئے۔ گزشتہ روز راکسی تھیٹر کے ہال میں مقامی خواجہ سرا دنیا کی سالگرہ کی تقریب تھی جس میں کراچی، اسلام آباد سمیت ملک کے طول و عرض سے نامور خواجہ سرا مدعو تھے۔ معلوم ہوا ہے کہ تقریب اپنے پورے جوبن پر تھی اس دوران سالگرہ پر بنی ٹھنی سونیا وہاں پہنچی تو وہاں موجود ایک شخص نے اس کا والہانہ استقبال کیا اوردونوں ایک دوسرے کے ساتھ لپٹ گئے جس پر بلال روڈ کے ملک عثمان نامی گریا نے طیش میں آ کر فائرنگ کردی جس کی زد میں آکر یاسین عرف رانی، اصغر عرف شہنام شدید زخمی ہوگئیں۔ اس دوران ہال میں بھگدڑ مچ گئی، آپس میں ٹکرا جانے سے گورو رانا جاوید المعروف شاہ جی اور لاڈو سمیت کئی مہمان زخمی ہوگئے۔ پولیس نے موقع پر پہنچ کر ملک عثمان کو پسٹل سمیت حراست میں لے لیا۔