پنڈی بھٹیاں + حافظ آباد (نامہ نگار+ نوائے وقت نیوز) حافظ آباد کے نواحی گائوں کوٹ نکہ کے قریب پاکستان ائر فورس کا تربیتی طیارہ گر گیا۔ ذرائع کے مطابق طیارہ کھیتوں میں گرا۔ جس سے انجن اور آدھے سے زیادہ طیارہ جل کر خاکستر ہو گیا۔ تربیتی طیارے میں سوار دونوں پائلٹ محفوظ رہے۔ دونوں پائلٹس نے پیراشوٹ کے ذریعے چھلانگ لگا کر جان بچائی۔ پاک فضائیہ کے ترجمان کے مطابق طیارہ فنی خرابی کے باعث گر کر تباہ ہوا۔ واقعہ کی تحقیقات شروع کر دی گئی ہیں۔ بتایا گیا ہے طیارہ سرگودھا سے پرواز کیلئے اڑا تھا، دونوں پائلٹس کو ہیلی کاپٹر کے ذریعے سرگودھا منتقل کر دیا گیا۔ جائے وقوعہ پر پاک فضائیہ کی ٹیم اور پولیس کی بھاری نفری پہنچ گئی۔